महन्थ ठाकुरको आरोप: सरकार बाह्य प्रभावमा चलिरहेको छ

काठमाडौं असार ९ -  जनता समाजवादी पार्टी (जसपा) नेपालका सांसद महन्थ ठाकुरले वर्तमान सरकारले राष्ट्रिय हितभन्दा बाह्य शक्तिको स्वार्थलाई प्राथमिकता दिएको आरोप लगाएका छन् । 

मंगलबार राष्ट्रिय सभा अन्तर्गतको विकास, आर्थिक मामिला तथा सुशासन समितिको बैठकमा बोल्दै उनले राज्य संयन्त्र प्रभावकारी रूपमा सञ्चालन हुन नसकेको टिप्पणी गरे । सरकारले नेपाली जनताको हितअनुसार नभई बाह्य मुलुकहरू सन्तुष्ट हुने गरी काम गरिरहेको उनको भनाइ थियो।

ठाकुरले देशको स्वतन्त्रता र स्वाभिमानमाथि समेत असर पर्ने अवस्था सिर्जना भएको दाबी गर्दै सरकार जनताप्रति भन्दा बाह्य शक्तिप्रति बढी जवाफदेही देखिएको आरोप लगाए । उनले  राष्ट्रिय हित र जनअपेक्षालाई केन्द्रमा राखेर काम गर्न सरकारलाई आग्रह समेत गरे ।