इरान–अमेरिका बीच सम्भावित सम्झौताबारे प्रारम्भिक मस्यौदा प्राप्त भएको दाबी

इरानको सरकारी सञ्चारमाध्यमले अमेरिकासँग सम्भावित सम्झौताबारे प्रारम्भिक र अनौपचारिक मस्यौदा प्राप्त भएको दाबी गरेको छ। रिपोर्टअनुसार प्रस्तावित सम्झौताले मध्यपूर्वको महत्वपूर्ण समुद्री मार्ग हर्मुज स्ट्रेटमा जहाज आवागमन र क्षेत्रीय सैन्य उपस्थितिबारे नयाँ व्यवस्था समेट्न सक्ने देखिएको छ।बीबीसी फारसीले उद्धृत गरेको समाचारमा उल्लेख भएअनुसार प्रस्तावित योजनाअनुसार इरानले एक महिनाभित्र हर्मुज स्ट्रेटमा व्यावसायिक जहाजको आवागमनलाई युद्धपूर्वको अवस्थामै फर्काउनेछ। बदलामा अमेरिकाले इरान आसपास तैनाथ आफ्ना सैन्य बल फिर्ता गर्ने र नौसेनासम्बन्धी नाकाबन्दी हटाउने विषयमा सहमति जनाउन सक्ने उल्लेख छ।त्यस्तै, जहाज मार्ग व्यवस्थापनलाई प्रभावकारी बनाउन इरान र ओमानबीच सहकार्य गर्ने विषय पनि प्रस्तावमा समेटिएको बताइएको छ। ओमान लामो समयदेखि यस क्षेत्रका कूटनीतिक संवाद र मध्यस्थतामा महत्वपूर्ण भूमिका खेल्दै आएको देश हो।यसैबीच, इरानको सर्वोच्च राष्ट्रिय सुरक्षा परिषद्को सचिवालयअन्तर्गत विदेश नीति र अन्तर्राष्ट्रिय सुरक्षा मामिलाका उपनिर्देशक अली बघेरी कानीले पनि हर्मुज स्ट्रेटबाट जहाज आवागमनसम्बन्धी नयाँ प्रक्रियाबारे इरान र ओमानबीच छलफल भइरहेको पुष्टि गरेका छन्। उनका अनुसार, हालसम्म कुनै पनि विषयमा अन्तिम सहमति भइसकेको छैन।कानीले स्पष्ट पार्दै भनेका छन्, “युद्ध सुरु हुनुअघिको अवस्थासँग तुलना गर्दा हर्मुज स्ट्रेट हुँदै हुने आवागमनका सर्त र प्रक्रिया पूर्ण रूपमा फरक हुनेछन्।” तर उनले थपे, “सबै मुद्दामा सहमति नभएसम्म हामी कुनै पनि विषयमा सहमति भएको मान्दैनौँ।”यस घटनाक्रमले इरान–अमेरिका सम्बन्धमा सम्भावित नयाँ कूटनीतिक पहलको संकेत दिएको भए पनि दुवै पक्षबीच औपचारिक सम्झौतामा पुग्न अझै समय लाग्ने विश्लेषकहरूले बताएका छन्।